Një nismë që lindi nga vizioni dhe u rrit nga nevoja!

Nisma për krijimin e ACTI daton që prej vitit 2019, kur një grusht kompanish vizionare u bashkuan me një ide të guximshme: të mos konkurojnë më sipas mënyrës klasike, por të bashkojnë forcat për të rritur njëra-tjetrën – për të ndarë dije, për të sfiduar veten dhe për të perfeksionuar ADN-në teknologjike të secilës prej tyre.

Në atë kohë, tregu nuk ishte ende gati për një qasje të tillë bashkëpunuese. Iniciativa nuk gjeti përkrahjen e duhur dhe, në pamje të parë, u shua. Por ashtu si feniksi që ngrihet nga hiri, një ide që lind nga një nevojë e thellë nuk zhduket kurrë plotësisht. Ajo qëndroi ndezur e heshtur por e gjallë, duke pritur momentin e duhur për t’u ringjallur – më e fortë, më e pjekur dhe më domethënëse se kurrë më parë.

Sot, rikthimi i kësaj nisme nuk vjen më nga dëshira e pak njerëzve, por nga nevoja kolektive për t’u përballur me sfidat reale që paraqet teknologjia dhe zhvillimi i shpejtë i tregut. Dikur, kompanitë i mbanin projektet të fshehura, përpiqeshin të lidhin fort punonjësit, nuk ndanin ide, dhe i druheshin kritikës. Sot, ato kompani janë rritur – dhe bashkë me to është rritur edhe gatishmëria për bashkëpunim, ndarje dijeje dhe zhvillim të përbashkët.

Kështu lindi ACTI, jo si një ide e re, por si një rikthim i pjekur dhe i domosdoshëm – një organizëm që po rritet dita-ditës, duke krijuar një ekosistem të shëndetshëm, frymëzues dhe vizionar.

ACTI nuk është vetëm një këshill – është një bashkim vlerash, përvoje dhe përkushtimi për të ndërtuar të ardhmen dixhitale të Shqipërisë mbi themele bashkëpunimi dhe besimi.