Switch 2 tashmë ka tejkaluar shifrën e 10 milionë njësive të shitura që nga lansimi i saj në qershor. Popullariteti i Switch 2 ka tejkaluar pritshmëritë, duke bërë që Nintendo të rrisë parashikimet për shitjet me mbi 25 përqind. Në raportin më të fundit financiar për periudhën 1 prill – 30 shtator, Nintendo parashikon të shesë 19 milionë njësi Switch 2 deri në mars 2026, nga 15 milionë që ishte parashikimi i mëparshëm.

Shitjet e larta të harduerit dhe softuerit

Kompania japoneze raporton se deri tani janë shitur 10.36 milionë konzola Switch 2, nga të cilat 4.54 milionë hyjnë në periudhën e fundit financiare. Përveç kësaj, janë shitur gjithashtu 20.62 milionë lojëra Switch 2 që nga lansimi. Megjithatë, Nintendo ka rritur me pak parashikimin për shitjet e lojërave nga 45 milionë në 48 milionë.

Shitjet e kombinuara të harduerit dhe softuerit kanë sjellë një rritje të të ardhurave prej 110 përqind, duke arritur në ¥1,099.5 miliardë (afërsisht $7.1 miliardë) në periudhën prill-shtator, në krahasim me ¥523.2 miliardë (rreth $3.4 miliardë) të vitit të kaluar për të njëjtën periudhë. Për më tepër, Nintendo ka rritur edhe parashikimin e të ardhurave për fundvitin në ¥2,250 miliardë (rreth $14.6 miliardë), dhe konfirmon se ka marrë në konsideratë tarifat amerikane për këto përditësime.

Krahasimet me konsolat e mëparshme

Ndërkohë që Switch 2 është konzola më e shitur në histori në periudhën fillestare, Switch origjinale ende po rritet në shitje. Deri më sot, Switch ka arritur në 154.01 milionë njësi të shitura në total, shumë pranë DS që ka shitur 154.02 milionë dhe ende mban rekordin si konzola më e suksesshme e Nintendo-s. Pas tejkalimit të DS, Switch synon të kalojë edhe 160 milionë për të thyer edhe rekordin absolut të PlayStation 2 të Sony-t.

Për krahasim, Wii U mezi ka arritur në 13.7 milionë njësi të shitura gjatë gjithë ciklit të saj jetësor, shifër që Switch 2 pritet ta kaloje me shumë lehtësi para vitit të parë në treg. Këto arritje e vendosin Nintendo në një pozitë të favorshme për të ardhmen, ndërsa vazhdon të dominojë tregun e konzolave me inovacion dhe rezultate rekord në shitje.

Tags: Nintendo, Switch 2, Shitje konzolash, Tregu i lojërave, Rezultate financiare, Rekord shitjesh