A është aq keq, sa është mirë? Google së fundi është bërë pjesë e trendit të ikonave të topit diskotekë, duke u bashkuar me argëtimin që ka pushtuar ekranet kryesore të përdoruesve. Pas ikonës së re të përkohshme të aplikacionit të Spotify si top diskotekë, e cila u lançua për 20-vjetorin e kompanisë dhe shkaktoi reagime të përziera online, Google vendosi të shtojë pak humor në situatë duke lançuar një set të ri ikonash në Android të frymëzuara nga topat diskotekë.

Ikonat e reja diskotekë në Pixel

Drejtuesi i ekosistemit Android, Sameer Samat, bëri një postim në X ku tha: “Dëshira juaj është urdhër për ne. Ikonat diskotekë tani janë të disponueshme në Pixel”. Në postim ai ndau një pamje të ekranit të një telefoni Pixel të mbushur plot me ikona të shndritshme dhe me tematikë topi diskotekë. Rezultati është po aq interesant (ose i diskutueshëm) sa tingëllon.

Këto ikona të personalizuara janë të disponueshme përmes funksionit të ri në Pixel për të personalizuar ikonat, duke i lejuar përdoruesit të zgjedhin stile të ndryshme të krijuara me ndihmën e inteligjencës artificiale. Më parë, i vetmi ndryshim që përdoruesit mund t’i bënin ikonave ishte ndryshimi i ngjyrës për t’u përshtatur me sfondin ose temën e telefonit.

Personalizime të reja për përdoruesit Android

Funksioni i ikonavet të personalizuara u lançua në “March Pixel Drop”, një përditësim i rregullt i veçorive për telefonat Pixel. Ky përditësim solli stile të reja si “Scribbles” me pamje të vizatuar me dorë, “Treasure” me pamje të artë, “Easel” në një stil të ngjyrave të ndezura dhe shumë të tjera.

Ditë më parë, Samat kishte bërë shaka në X për krijimin e këtij stili të ikonave edhe për Android, duke ndarë një version të shndritshëm të ikonës së Chrome. Megjithëse ironike, Google e bëri realitet këtë paketë ikonash, duke dëshmuar gatishmërinë për të eksperimentuar me personalizime të reja.

Ndërkohë, ikona diskotekë e Spotify kishte nxitur komente të shumta negative nga përdoruesit, të cilët e quajtën të shëmtuar. Megjithatë, Spotify sqaroi se ikona ishte thjesht e përkohshme. Ndryshe nga Spotify, Google duket se pëlqen më shumë pamjen argëtuese, duke ofruar përdoruesve mundësinë të shndërrojnë gjithë ekranin kryesor në një peizazh me aplikacione të ndritshme dhe lozonjare.

Në fakt, sipas një raportimi të New York Times, trendi i “whimsy” është tepër popullor mes brezit të ri, të cilët zgjedhin t’i japin pak më shumë fantazi përditshmërisë përmes detajeve të tilla të personalizuara. Përdoruesit në rrjetet sociale kanë reaguar me humor mbi këtë risi, duke pranuar se edhe nëse ikonat janë “të çuditshme”, eksperienca bëhet më e këndshme dhe më argëtuese.

Tags: Google, ikona diskotekë, personalizim Android, Pixel, trendet teknologjike, inteligjencë artificiale