Coupang, një nga kompanitë më të mëdha të tregtisë elektronike në Korenë e Jugut, është përballur së fundmi me një prej shkeljeve më të rënda të të dhënave personale, duke ekspozuar gati 34 milionë klientë. Ky incident tashmë ka kaluar përmasat e sigurisë kibernetike dhe është kthyer në një pikë tensioni gjeopolitik, pasi një numër i madh investitorësh amerikan po ndërmarrin hapa ligjorë kundër qeverisë së Koresë së Jugut.

Skandali i shkeljes së të dhënave dhe paditë ndërkombëtare

Çështja nisi si një hetim rregullator për sigurinë e të dhënave, por shpejt u zgjërua në një konflikt më të madh mbi trajtimin e padrejtë ndaj kompani Coupang, e cila e ka selinë globale në Seattle, SHBA, megjithëse operon në Korenë e Jugut, Tajvan dhe Japoni. Investitorët amerikanë, përfshirë fondet Greenoaks, Altimeter, Abrams Capital, Durable Capital Partners dhe Foxhaven Asset Management, kanë parashtruar kërkesë zyrtare për arbitrazh ndërkombëtar sipas Marrëveshjes së Tregtisë së Lirë SHBA-Kore (FTA), duke pretenduar humbje financiare të shkaktuara nga hetimet e padrejta dhe diskriminuese të qeverisë koreane pas rrjedhjes së të dhënave.

Coupang zbuloi në dhjetor se të dhënat personale të pothuajse 34 milion përdoruesve koreanojugorë, përfshirë emra, email, numra telefoni, adresa dërgese dhe histori të blerjeve, u komprometuan gjatë një periudhe prej pesë muajsh. Megjithëse rrjedhje të ngjashme të teknologjisë në Kore janë trajtuar me masa më të lehta, Coupang është gjendur nën presion të jashtëzakonshëm nga autoritetet, të cilat kërcënuan me gjoba të mëdha, pezullim të operacioneve dhe ndalim udhëtimi për drejtuesit e kompanisë. Investitorët njohën gjithashtu se qeveria u mundua të pengojë komunikimin publik të kompanisë dhe të minimizojë realisht përmasat e incidentit, duke rritur akuzat për trajtim diskriminues.

Pasojat ekonomike dhe debati global për trajtimin e teknologjisë amerikane

Komisioni për Mbrojtjen e të Dhënave Personale në Kore (PIPC) njoftoi se ishin prekur mbi 30 milionë llogari, ndonëse sipas investitorëve të Coupang vetëm rreth 3,000 llogari u komprometuan realisht. Me ligjet aktuale, gjobat mund të arrinin deri në 3% të të ardhurave vjetore të kompanisë, që për Coupang përkthehet në mbi 800 milionë dollarë. Disa deputetë koreanojugorë shkuan edhe më tej, duke propozuar kufij të rinj gjobash deri në 10% të të ardhurave dhe aplikimin e tyre me efekt prapaveprues, çka rriti më shumë tensionet me investitorët amerikanë.

Sipas padisë së investitorëve, qeveria koreane ka vepruar në mënyrë të pabarabartë, duke dënuar më rëndë Coupang krahasuar me kompanitë e tjera teknoogjike, si KakaoPay, SK Telecom, Upbit dhe AliExpress, të cilat pësuan edhe ato rrjedhje të të dhënave, por trajtimi i tyre ishte shumë më i butë. Për shembull, KakaoPay u ndëshkua me vetëm 10 milionë dollarë gjobë për transferimin ilegal të të dhënave, dhe drejtuesit e saj u paralajmëruan, ndërsa SK Telecom mori një dënim më të madh, por asnjë rast nuk u trajtua me ashpërsinë e rastit Coupang.

Qeveria koreane pretendon se shkelja u krye nga një ish-punonjës kinez, që kishte akses në sistemin e autentikimit të të dhënave të Coupang. Ai arriti të marrë të dhëna nga mbi 33 milionë llogari, por ruajti vetëm rreth 3,000 para se të fshinte pjesën tjetër. Coupang konfirmoi se asnjë prej të dhënave nuk përfshinte pagesa, fjalëkalime apo informacione të tjera sensitive. Kompania gjithashtu zëvendësoi CEO-n e saj Park Dae-jun me avokatin amerikan Harold Rogers në dhjetor, si pjesë e masave për rikthimin e besimit.

Në këtë periudhë, Kongresi Amerikan ka filluar të shqyrtojë politikat dhe komisionet koreane, me akuza për diskriminim ndaj firmave teknologjike amerikane, ndërsa ekspertët paralajmërojnë rritje të rrezikut tregtar dhe tarifor mes dy vendeve. Disa kritika ndërkombëtare janë ngritur edhe për politikat digjitale të Koresë që favorizojnë kompanitë lokale, si taksat e përdorimit të rrjeteve ndaj platformave ndërkombëtare si Netflix, rregullat e pagesave të Apple App Store dhe Google Play, si dhe detyrimet për lokalizimin e të dhënave që pengojnë shërbime ndërkombëtare si Google Maps.

Rasti Coupang po shërben si një shembull i debativë më të gjerë për mënyrën se si të gjitha kompanitë teknologjike të huaja po trajtohen nga autoritetet koreane. Investitorët theksojnë se, nëse qeveria koreane nuk i jep fund këtij trajtimi dhe rikthen operacionet normale të kompanisë, ata do të kërkojnë miliarda dollarë dëmshpërblim. Ndërkohë, procesi i konsultimeve 90-ditore midis palëve përpara arbitrazhit vijon, dhe rezultati pritet të ndikojë jo vetëm në industrinë e teknologjisë, por edhe në marrëdhëniet tregtare SHBA-Koreja e Jugut në tërësi.

Tags: Coupang, shkelje të dhënash, investitorë amerikanë, Koreja e Jugut, arbitrazh ndërkombëtar, tensione SHBA-Kore